رئيس مجلس الإدارة : رشا الشامي

رئيس التحرير : أسامة الشاذلي

نصائح الأراجوز الحكيم للرجال المتزوجين .. عزيزي أيبك شجرة الدر يتفات لها بلاد وبلاد

نصائح للمتزوجين

الأراجوز

العلاقة بين الرجل والمرأه، علاقة غامضة، خضعت لدراسات كثيرة من قبل باحثين ومتخصصين للوصول إلى إجابة السؤال كيف تنجح في الحفاظ على العش الهادئ؟! ولكن هيهات يا عزيزي أيبك، شجرة الدر، يتفتلها بلاد وبلاد، لذلك وبما إني أراجوز حكيم خليني أنصحك شوية نصائح يمكن تنجيك في لحظات مصيرية من إنك تتعبى  في أكياس.

– أي راجل في الغالب عينه زايغه، أو في أقل تقدير بيقدر الجمال، وطبعاً بعد الزواج مسألة تقدير الجمال دي لازم تنساها تماماً، يعني أوعاك تبقى ماشي معاها وتشوف واحدة حلوه وتقول ماشاء الله، لإنها في الغالب هتكبر في وشك وتبقى على وشك الذبح، ذبحك طبعاً.

– طبعاً إنت ممكن تبقى عجباك واحده ولا حاجة، وفاكر إن المدام مش واخده بالها، متآمر وأهبل يعني، ممكن تعملك فخ وتقول قصادك على فكره فلانة دي حلوة أو لبسها شيك أو إنها معجبة بيها وبشخصيتها مثلاً، في اللحظة دي اعمل من بنها، ولا كأنك سمعت حاجة، وحاول تنكر إنك شوفتها أصلاً أو واخد بالك منها، أيٍّ كان نوع التعذيب اللي ممكن تتعرضله.

– أي ست بعد الزواج بتحاول أقصى جهدها تطبخ وتعملك اللي ماتعملش، خصوصاً في الشهور الأولى، طبعاً دي حظوظ، وافتكر دايماً لبنى عبد العزيز لما عملت الكانلوني، حاول لو الأكل طلع مش ولابد، ما تقولش ده صراحة، تعامل بمنطق النكتة بتاعت أمك نزلت تلعب في الشارع، واحدة واحدة وصل المعلومة، وابدأ دايماً بالمدح، وبعدين أوصل معاها تدريجياً للي بتفضله عشان ماتقضيش عمرك بتاكل دليفري أو جبنة بيضا.

– ممكن تسمع منها أفكار غريبة، أغرب من الخيال، إياك والسخرية، حاول توصلها إنها سابقة عصرها وإن أفكارها دي خسارة في المجتمع المتخلف اللي احنا عايشين فيه، غير كده، ممكن تجبها من قسم الشرطة كل يومين تلاتة.

–  عزيزي الرجل، المرأة ممكن تكون النص الحلو، وممكن تكون الكل الوحش، أنت وشطارتك، خليك واثق من نفسك وأد المسؤولية، لكن في الوقت نفسه كن حذراً، لأن غضبها لا يمكن إدراك نهايته، دي أقوى من أبو الغضب ذات نفسه، وعلى فكره مافيش ست بتنسى، الرجالة بس اللي بتنسى، يعني ممكن بعد 25 سنة زواج تقولك فاكر في الخطوبة لما عملت كذا ولا كذا، وطبعاً أنت في اللحظة دي مش فاكر أصلاً مين اللي واقفة قصادك وبتقولك كده.

هو شر لابد منه، وفي النهاية أنا بقولكم شوية نصائح يمكن تهدّي النفوس، وبالرفاء والبنين.

 تعليقاتكم

Your email address will not be published. Required fields are marked *

*

كبدة العربيات بتيجي منين؟ .. رحلة “ساندوتش مستورد” يهدد حياتك