رئيس مجلس الإدارة : رشا الشامي

رئيس التحرير : أسامة الشاذلي

فواكه الأغاني .. فراولة وعنب وبلح ومانجو

فواكه

الهانم

هي الحاجة الي بيحبها الكبير والصغير، تسلية، وتحلية، وهدية للمريض، وهدية لما تدخل لحد أول مرة بيته، هي الحلوة والحادقة والجميلة والمسكرة، الفاكهة…أجمل حاجة في الحياة…

منها المانجة اللي ليها طقوس في الأكل، ومنها التفاحة اللي خرجتنا م الجنة، ونزلت علي دماغنا نظرية النسبية، ومنها الموز صديق الأطفال والكبار، ومنها البطيخ، فاكهة الحر الرسمية، وأنواع وأنواع…

زي ما اتكلمنا عن “الشوكولاتة في الأغاني” قبل كدة، جيت النهاردة أكلمكم عن “الفواكه” في الأغاني…وهي متعددة، علي مر سنين كتير وفنانين أكتر، وخلونا نبدأ كدة بحاجات تفتح النفس..!

1- “العنب العنب العنب…”
ودي طبعا درة من درر الأغاني الشعبية بتاعة سعد باشا الصغير، اللي جاب فيها سيرة الموز والمانجة، والعنب العنب العنب طبعا، ولحد دلوقتي محدش فاهم ليه كرر العنب تلات مرات، واشمعني العنب الي غناله؟ وايه نوع العنب ده؟ بناتي؟ ولا عنب من أبو بذر كبير ده ولا ايه..!

2- “الفراولة بتاع الفراولة…”

الكبير، كبير أهل الصعيد وعميد التراث المصري، الريس متقال، غني للفراولة علي ربابته الجميلة وقالك “اااااااااااااه يا فراولة” والأغنية كسرت الدنيا طبعا..

 

3- “شبه الخوخة، يا شبه الخوخة، وكلامها موصوف للدوخة”
شفيق جلال وصف “بنت الحارة” في أغنيته بأنها ناعمة زي “الخوخة” وجميلة..

4- “يابا يابا ع اللمونة وادي رقصة المجنونة..”
في استعراض “المجنونة” المشهور في فيلم “غرام في الكرنك” جابو سيرة اللمون الله يمسيه بالخير بقي 😀

نيجي لحالة استثنائية في مجال الغنا المصري، الفنان المصري، الحائز علي لقب فكهاني الفن المعاصر “محمد منير”..!


يعتبر منير من أكتر الفنانين اللي جابو سيرة الفواكه في اغانيه، والدليل علي كدة، عينات من بعض الأغاني..:
5- “رمان خلاص انفرط…حبك ولا همني..”
6- “اللي انكتب مفروط..يا عنقود العنب…”
7- “شجر الموز طرح “المسطرح” ضلل علي عيدانه”
8- “يا بلح أبريم يا سمارة..”
9- “شكلني بطعم الأفراح، لونني بلون التفاح، وبطعم المانجة وكمانجة، اعزفلي علي الجرح أرتاح..”
10- “تين علي لوز، لأ، لوز علي تين :D”
ولو عندك أغاني تانية جايبة سيرة الفاكهة ياريت تقولنا عليها في تعليق، واوعي تنسي تعمل شير ولايك للمقالة لو عجبتك 😊

حقوق الملكيه للصور:
فواكه

 تعليقاتكم

Your email address will not be published. Required fields are marked *

*

CONTENT MAK Company