رئيس مجلس الإدارة : رشا الشامي

رئيس التحرير : أسامة الشاذلي

عن أحمد وريم وسمية..وكفاية

احمد سعد و سمية الخشاب

الأراجوز

اعطني ممثلة أدوار ثانية، وأخري ذات مشوار فني متخبط، مع مغني متردد الخطوات، وسأعطيك أخبار للسوشال ميديا تسد عين الشمس..!

في غفلة من الزمن، تقمصت دور اللمبي، لما صلاح وعاطف كانو واقفين يتخانقو مين هيصحيه ف شخص فيهم قالهم: خلصونا بقي م الهيصة دي، انا صحيت خلاص، انا بقي نفسي حد يخلصني م الهيصة دي، ويخفي من قصادي أخبار أحمد سعد، وسمية، وريم البارودي..!

بدأت القصة في الأصل خالص، بأن ريم البارودي كانت صاحبة “مرات” أحمد سعد الأولانية، وطبعا صاحبتها داخلة خارجة ع البيت، وحلوة، حلوة مفيش كلام وشبه خالتها الجميلة “شمس البارودي”، وده كان أول مشهد: أحمد سعد طلق مراته واتجوز ريم البارودي..!

الثنائي الجميل، اللزج بعض الشئ، كان بيطلع في كل حتة، وف أي حاجة، وعملو مع بعض فعلا مسلسل اسمه “احنا التلامذة” أحمد سعد نفسه مشافوش! وكل شوية يقولو انهم مخطوبين، مخطوبين، ومش عارف ايه الخطوبة الجملي دي..!

المهم يعني، روحي يا أيام وتعالي يا أيام، وريم وأحمد متجوزين ودخلت بيهم صاحبتها الأنتيم “سمية الخشاب” ويشاء السميع العليم اللي ريم عملته يطلع عليها، وحصل المشهد التاني: أحمد سعد طلق ريم البارودي واتجوز صاحبتها 😀
وسبحان الله احمد عمل مع سمية غنوة لمسلسلها “الحلال” اللي اتعرض ف رمضان وقامت ببطولته مع فشا التاتة الأول: بيومي فؤاد..!

وطول الوقت صور سمية وأحمد بتتنتور ف كل حتة، وهما بيأكدو انهم مش متجوزين، ولا مرتبطين، ولا متصاحبين، وانهم أصديكاء وبس..! وياعيني ريم البارودي تتشال وتتهبد، وتقولك كنت متجوزاه، وهو يقولك لأ، لدرجة ياعيني ان البنت نشرت صورة عقد جوازهم علي انستاجرام!

بصراحة انا مش فاهمة ايه سبب ان “سمية” تعمل فرح ودي الجوازة رقم خمسة تقريبا، ولا ان أحمد سعد يعمل فرح لجوازته التالتة ع التوالي غير انه يحرقو دم “ريم البارودي” وكدة خلاص احنا سبنا الأغاني والمسلسلات والمزيكا ودخلنا ف كيد النسا !

لو كان “أحمد سعد” بيركز في الفن والمزيكا قد تركيزه مع “الستات” وال”حاجات إياها” كان زمان عندنا بليغ حمدي التاني، بس بصوت جبار زي صوت سعد، ولو كانت سمية الخشاب ركزت ف شغلها كان زمانها حاجة تانية دلوقتي، بتسد فجوة في البطولات النسائية مش موجودة دلوقتي، لكن للأسف خطواتها الغبية، وبعدها تراجع في مستوي شغلها، بعد ما كانت قدمت فيلم مهم زي “حين ميسرة” طلع عمرو سعد “أخو جوزها” من مصاف ممثلين الأدوار التانية لأنه بقي نجم دلوقتي، بيعمل أفلام ومسلسلات وبتتباع باسمه، لكن هي فضلت زي ماهي، وبقت بترجع ورا، كذلك الحاجة “ريم البارودي” الي مشفنلهاش حاجة تقريبا من بعد مسلسل “دلع بنات” من أربع سنين، وكل واحد ركز ف شغله بدل الصداع ده، كانت الحياة هتبقي أحلي كتير والله..!

دمتم سالمين بعيدا عن أخبار المشاهير المصريين التافهين..!

 تعليقاتكم

Your email address will not be published. Required fields are marked *

*

CONTENT MAK Company