رئيس مجلس الإدارة : رشا الشامي

رئيس التحرير : أسامة الشاذلي

عندهم ” هالويين “؟ .. عندنا نداهة!

هالويين

المعلم

شهر أكتوبر هو الشهر المفضل بنسبة ليا ولأي حد بيحب الرعب، فلو أنت بتحب الرعب يبقى أكيد مزبط الدنيا. أخر يوم في شهر أكتوبر بيكون هو الـ ” هالويين ” والسنة دي كمان تاني جمعة في “أكتوبر” يوم 13.

لو أنت مش فاهم إيه علاقة إن الجمعة يوم 13 بالـ ” هالويين ” والرعب خليني أفهمك؛ فيه خرافة بتقول إن لو يوم الجمعة جاي يوم 13 يبقى يا ويلك يا سواد ليلك، يوم كله نحس وأحداث مش لطيفة. بدأ ارتباطه بالرعب بعد أول فيلم في سلسلة “الجمعة الثالث عشر” اللي تعتبر من أنجح سلسلات الأفلام في أمريكا إطلاقًا مش في الرعب بس.

إحنا دايمًا بنسمع عن قصص وأساطير الرعب الغربية وقليل جدًا لما نلاقي حد عارف أي أسطورة أو قصة رعب من أساطيرنا إحنا مع إنهم أحسن من بتوع الغرب بمراحل فخليني أحكيلكم شوية قصص من عندنا:

النداهة هي من أشهر أساطير الرعب المصرية ولها شبيهة في المغرب “عيشة قنديشة” وفي الخليج “أم الدويس”. بدأت الحكاية كلها في ريفنا المصري وبتقول الأسطورة إن النداهة دي ست غريبة في منتهى الجمال بتنادي على الرجالة اللي بيتفتنوا بصوتها وبيفضلوا ماشيين وراه لحد ما يوصلولها، اللي بيحصل بعد ما يوصلولها بتختلف فيه الأقاويل؛ في ناس بتقول إن النداهة بتقتل الرجالة دول على طول وغيرها بيقول إنها بتجننهم وفي ناس بتقول إن اللي النداهة بتناديه هي وقعة في حبه وبتدعيه لعالمها وسبب موته إنه اتخلى عنها و قرر يسيب عالمها السفلي فهي بتنتقم منه.

أداة التخويف المفضلة للأمهات هي أمنا الغولة بس ياترى إيه حكايتها؟ بيتحكي إن أمنا الغولة دي ست في غاية الجمال بتتحول لغول بليل وبيبقى عندها عين واحدة حمرا وجسم ضخم وأكيد بتاكل الولاد اللي مابتسمعش كلام أهلها وده اللي بيربط بينها وبين أبو رجل مسلوخة بس الفرق إنه بيخطف الولاد بس مش بياكلهم.

السلعوة اتحولت من مجرد أسطورة لحقيقة. الأسطورة بدأت في عهد الفراعنة وكانت بتقول إن السلعوة ده كائن شبه التعلب والذئب بتهاجم أي حد بيتعدى على حرمة المعابد والمقابر الفرعونية. كانت كل الناس فاكراها مجرد أسطورة فرعونية لحد ما بدأت تظهر في القاهرة في الستينات والسبعينات بعدين اختفت لحد 1996 ومن ساعتها وهي بتظهر بشكل شبه مستمر. السلعوة لحد دلوقتي مش مصنف من قبل علماء الحيوان.

ياترى أي أسطورة من دول أو غيرهم ممكن نكتشف إنها صح زي السلعوة كده في المستقبل؟

 تعليقاتكم

Your email address will not be published. Required fields are marked *

*

كبدة العربيات بتيجي منين؟ .. رحلة “ساندوتش مستورد” يهدد حياتك