رئيس مجلس الإدارة : رشا الشامي

رئيس التحرير : أسامة الشاذلي

علي حسين ..انت فين؟

علي حسين

ريم نفادي

في زمن ما قبل “فيسبوك” ومع بداية “زحف” الفضائيات الموسيقية، واستكشافي لمواهب كتير منهم الفنان اللوذعي “جاد شويري”، وقع في طريقي فنان جميل، من أعماق صعيد مصر، فنان عظيم اسمه “علي حسين”.

ابن كوم امبو البار، صاحب ال3 ألبومات، والمختفي عن الساحة الفنية حاليا، رغم موهبته الكبيرة وصوته المرهف الحساس، متأثر جدا بمدرسة أحمد منيب الموسيقية، لكنه بذكاء شديد، مقلدش أداءه ولا أداء “محمد منير”، وكانت النتيجة تجربة فنية جميلة جدا، مستمرتش كتير..

قدم “علي حسين” 3 ألبومات هما: قلبي تاه – آن الأوان – قلوب الناس.

في الألبوم الأول كان متأثر بشكل كبير بالسلم السباعي النوبي، وبأداء “أحمد منيب” لكن بعد كدة ملامح تجربته الغنائية في ألبوم “آن الأوان”.

في ألبوم “آن الأوان” ابتعد “علي” عن كلام الحب والغرام التقليدي، وقدم أغنيات جريئة في موضوعاتها زي “حزين جدا سعيد” الي قال فيها مثلا: “ماحنا بنطلع نبكي ع الأموات، حتي يوم العيد”.

https://www.youtube.com/watch?v=dZr8-0zhC4w

وأغنيات تانية جميلة جدا، ومنسية للأسف زي”عاشق ولهان – آن الأوان – في عيونك ” وغيرها، ورغم تعامل “علي حسين” مع أسماء مش مشهورة في الألبوم ده من شعرا زي: يوسف ونس – عبد المنعم طه – هاني رجب – بدوي مبارك – هيثم سليم، وملحنين زي:  محمد مجيد –       حازم العمدة – محمد النادي – يحيي منير، لكن الألبوم ككل تجربة جميلة وجديدة، متكررتش غير مرة كمان، في ألبومه الأخير: “قلوب الناس”.

نجاح “علي حسين” اداله دفعة انه يتعامل مع أسماء أكبر في “قلوب الناس”، ويختار كلمات مختلفة وتوزيعات جديدة وألحان جميلة، فقدم في الألبوم ده أكتر من أغنية جميلة من افضلهم: قلوب الناس – حالي ايه – واحد شاي – طفلة كبيرة – عيونك السود – فلانة بنت فلان – يارب “دويتو مع محمد رحيم”.

من الشعرا اللي تعامل معاهم علي: نصر الدين ناجي – بهاء الدين محمد – حمدية التيتي. ملحنين زي: بلال سرور، حمدي صديق، محمد رحيم.

اسمع أغنية “واحد شاي”:

https://www.youtube.com/watch?v=LjvCoVKYbCM

وأغنية “معادش الحب”:

https://www.youtube.com/watch?v=yuYx0zVrjV8

هل ياتري هيرجع “علي حسين” للساحة تاني؟ وهنسمع منه أعمال جديدة ولا خلاص كدة؟ هيتحول لأسطورة محدش يعرف عنها حاجة غير الجيل الي عاصره وبعد كدة خلاص؟ محدش عارف، بس الأكيد اني أتمني أسمعه وأشوفه تاني، صعب موهبة زي دي تروح هدر كدة..فيا أستاذ “علي” أيا كنت فين وشغال ايه، ارجع، انا بحبك جدا.. ?


 تعليقاتكم

Your email address will not be published. Required fields are marked *

*

CONTENT MAK Company
الهمة - قريبا