رئيس مجلس الإدارة : رشا الشامي

رئيس التحرير : أسامة الشاذلي

شيرين ولعنة عمرو دياب

شيرين

الغازية

شيرين من نوعية الفنانين اللي تقريبا ما بيغيبوش عن الساحة أبدًا، تحس انك مش عارف هم بيشتغلوا امتى بالظبط، ومعدل انتاجهم للفن ممكن نقول انه أقل شوية حلوين من معدل أخبارهم وخناقاتهم ومشاكلهم، والفترة اللي فاتت حديث الساعة كان مشكلة شيرين وعمرو دياب التانية بعد ما شيرين أكدت ان الإساءة الأولى لعمرو دياب اللي كانت اعتذرت عنها كانت مقصودة بالفعل، ويقال انها قالت كده بعد فشل محاولات الصلح مع عمرو دياب .. ما علينا، مش موضوعنا، احنا الجمهور لينا إيه عند الفنان؟ لينا فنه، لينا لما نسمعله ألبوم أو نروحله حفلة نتبسط ونستمتع ونحس إنه ما خذلناش.. ودي الحدوتة.

شيرين الاسبوع اللي فات كانت عاملة حفلة في الساحل، شيرين جمهورها كبير ومتوزع في كل الوطن العربي، الناس حجزت تذاكر وراحوا وتقريبًا سعر التذكرة الvip تخطى الألف ونص، يعني لو كابل رايحين الحفلة فهم دفعوا 3000 جنيه عشان يسمعوا ويشوفوا شيرين بتغني ساعة ونص ساعتين، اللي حصل والتقارير اللي اتعملت عن الحفلة بتقول ان شيرين كانت متضايقة طول الحفلة وكان ليها تعليقات كتير كالعادة مش لطيفة زي تعليقها على الدخان الكتير اللي ع المسرح “أنا حاسة اني واقفة ف موقف ميكروباصات” وبيقولوا انها غنت يا دوب ساعة ومن غير نفس ثم قالتلهم تصبحوا على خير وانسحبت فجأة، يعني الحضور اللي جه متأخر شوية ممكن يكون قعد مع شيرين نص ساعة قبل ما تخلع، فيه ناس بتقول ان دي لعنة عمرو دياب، والحقيقة الموضوع ملوش علاقة بعمرو، له علاقة بشيرين.
هنا نبدأ نسأل بقى .. هل الناس ممكن تتجاوز سوء الفن حبًا في الفنان؟ والحقيقة ان الإجابة الحقيقية على السؤال ده بتقول ان ده ما حصلش على مر التاريخ أبدًا، طبعًا فكرة رصيد الفنان حقيقية فمش ممكن الجمهور يتجنب ممثل شاطر بعد فيلم نص نص بس مفيش فنان ما بيركزش ف فنه طول الوقت بيحافظ على مكانته، حتى أعتى العتاه، عادل إمام لحد النهارده لما بيعمل مسلسل نص نص الناس بتعلن استياءها وما بتكملوش، ما هو مش عشان بحبه هتفرج عليه ف عمل مش عاجبني خصوصًا مع وجود أعمال منافسة كتير أكثر جودة، وعلى مدار التاريخ الجمهور طلع بناس ونزل بناس تانية حسب ما يقدموه من فن والقاعدة دي هتفضل مستمرة مهما غرور الفن خلاه يتخيل ان الناس بتموت فيه هو شخصيًا.
السؤال الجاي أهم : هي شيرين عفوية وتلقائية وساذجة زي ما بيقولوا؟ الحقيقة احنا محتاجين نحط فروق واضحة بين العفوية والاستهتار العام، شيرين ف رأيي شخصية ذكية جدًا .. بتعرف تحقق مكاسب، عرفت تكبر نفسها صح من مجرد مطربة مبتدئة الناس بيشبهوها بالرجالة لنجمة كبيرة، عرفت تعمل ده زي ما تامر حسني وعمرو دياب وحماقي ونانسي وكتير عملوه، واللي في الغالب الناس العفويين ما بيقدروش يعملوه، شوفوا تاريخ محمد رشدي ومحمد قنديل .. قارنوا مواهبهم بموهبة حليم، هتلاقيهم متفوقين عنه كتير لكنهم نقدر نقول بالبلدي كده ناس طيبين، ملهمش ف ليلة النجومية وازاي تكبَّر نفسك وتضرب من تحت الحزام والجو ده، زيهم ف الجيل ده بهاء سلطان اللي لحد النهارده متورط مع نصر محروس ف شركته ومش عارف يروح شركة تانية مع إنه صوت عظيم وكان ممكن يبقى ف حتة أحسن بكتير، بس غلبان وملوش في العوق.

شيرين ف بدايتها عرفت تهرب من نصر محروس، عملت مشاكل وكان حديث الصحافة آه .. بس عرفت ازاي تكبر حتى لو كانت مضطرة تدفعله فلوس عشان تفسخ العقد، لما تشوف خطوات شيرين تتأكد انك أدام حد مش عفوي خالص، حد بيحسبها كويس، شاركت ف فيلم واحد ف بدايتها (ميدو مشاكل) بعدها قالت خلاص وفضلت تعلى كمطربة لحد ما عملت مسلسل طريقي، اللي يشوف شيرين ميدو مشاكل وشيرين طريقي يعرف انه ادام حد ذكي وبيلعبها صح، لما طلعت ف آراب أيدول عملت ميدلي فيه أغنية لأحلام وأغنية لنانسي وأغنية لراغب علامة وأغنية ليها من توزيع حسن الشافعي، بتشتري جمهور كل فنان فيهم وبتجامل الفنانين اللي دعوها والبرنامج وبتعمل شو لنفسها انها بتعرف تغني كل حاجة ولأ حد .. ده تفكير حد ذكي وواعي .. وعارف من أين يؤكل الكَتف، اللي بتعمله شيرين النهارده استهتار وغرور ملوش أي علاقة بالعفوية، والنتيجة تفشل حفلتها ف الساحل ف الوقت اللي جمهور عمرو دياب مترقب فيه نزول ألبومه بفارغ الصبر .. ودي لعنة شيرين عبد لوهاب .. مش لعنة عمرو دياب.

 تعليقاتكم

Your email address will not be published. Required fields are marked *

*

كبدة العربيات بتيجي منين؟ .. رحلة “ساندوتش مستورد” يهدد حياتك