رئيس مجلس الإدارة : رشا الشامي

رئيس التحرير : أسامة الشاذلي

حاجات بتعملها كل بنت لما بتقعد لوحدها

بنت

الغازية

كل بنت مهما ان كانت درجة عقلها وكمالها، من أول أصغر حي ف العشوائيات، لحد أرقي حي ف آخر كومباوند علي حدود القاهرة الجديدة، لما بتقعد لوحدها بتتهبل..!
احنا كائنات مجنونة، اه والله مجانين، علي رأي مولانا طيب الذكر “أبو الليف” ولذلك لما بننفرد بنفسنا، بنعمل حاجات لا يمكن تتعمل واحنا مع الناس، حتي لو أقرب الناس لينا…
أول حاجة ممكن تكون كل بنت عملتها انها تكون تخيلت نفسها بتنزل الشارع من غير حجاب، ولابسة اللبس القصير اللي مشترياه وعمرها ما هتعرف تلبسه مع الحجاب أولا، وفي شوارع القاهرة الحبيبة ثانيا..!! منكو لله يا متحرشين..!
الحاجة التانية اللي ممكن تتعمل هي اننا بنحط ميكب، ميكب كتير، تقيل خفيف، نهاري، ليلي، ادينا ماسكين الفرشة وقاعدين نلون وشنا وخلاص، وكدة كدة احنا ف البيت، محدش شايف هبلنا وفضايحنا..
حاجة كمان، انا عن نفسي بعملها لما باكون لوحدي، بغني، خصوصا لو كان فيه في الحوض طبقين، وقتها مسابقة عرب جوت تالنت بتفتح في مطبخ بيتنا، وكل الجيران في العمارة بتسمعني وانا بقسم ف “فات المعاد” وياسلام بقي لو خلصنا الطبقين وخرجنا نجرب مواهبنا في الرقص! واحنا خصوصا قدام المراية، نتفرج علي نفسنا واحنا هزة يمين وهزة شمال، ونازلة تحت دي جامدة فحت اشك اشك اشك..هزي يا بنتي هزي، محدش واخد منها حاجة..!
تشغيل الأغاني بصوت عالي طبعا جزء لا يتجزأ من كونك قاعدة في البيت لوحدك، ف الأغاني صوتها هيعلا هيعلا، مهرجانات بقي أوبرا، أي حاجة، المهم انك هتعملي دوشة تصحي مصر كلها…!

القعاد براحتي طبعا، جزء مهم من طقوس القعدة لوحدي، انا باحب الحرية، ومادام محدش شايفني، ألبس هدومي ليه! لما ممكن أحس بملمس المفرش القطيفة الناعم علي جسمي! والملاية النضيفة…واحساس انك مفيش بينك وبين الغطا حاجز..! الإحساس حلو ولازم تجربوه…بالاضافة طبعا لأنك بما انك لوحدك، هتاخد دوش وباب الحمام مفتوح..واحتمال تخرج م الحمام من غير بشكير ! بس حاسب يا حلو لاحسن ييجو فجأة عليك وتبقي فضيحتك بجلاجل يا حبيبتشي..!
شاركيني وقوليلي بتعملي ايه وانتي قاعدة لوحدك، ولو عجبتك المقالة اعملي شير ولايك للي بتعيش حياتها لوحدها..!

 تعليقاتكم

Your email address will not be published. Required fields are marked *

*

CONTENT MAK Company