رئيس مجلس الإدارة : رشا الشامي

رئيس التحرير : أسامة الشاذلي

تطبيق جديد هيرحم الرجالة من ” الشوبينج ” في مصر

تطبيق

الغازية

أيوة زي ما بقولك كدا تطبيق يخليكي تقيسي وتجربي كل الهدوم وأنتي قاعدة علي الكنبة بتشوفي المسلسل من غير بقي زحمة و طوابير ولا وجع دماغ و جمل من جوزك زي “خلصتي كدا؟”، “فاضل حاجة في المحل ما قيستيهاش؟”، “ده احنا عبرنا أسهل من كدا.”

طبعا المستفيد الأول والأخير من التطبييق ده لو اتعمل هيبقي الرجالة.. أيوة الرجالة، كل الرجالة هتترحم من خروجات الشوبينج مع مراتتهم و قعدتهم بالتلات أو أربع ساعات ماسك الشنطة، أو قاعد مع العيال برا مستنيها ويجيلك يجي 100 فكرة في الوقت ده “في إيه اللي عملته في نفسي ده!”، “وليه و هتروح فين الهانم بالهدوم دي يعني؟!”، بس بالتطبيق ده بقي هيبقي عندكوا وقت تقعدوا علي القهوة  أكتر وتشوفوا ماتشات و تتابعوا كل الحاجات المهمة دي.

فكرة التطبيق دي موجوده فعلا بس برا في الدول المتقدمة، من أشهر التطبيقات دي “Pictofit”، بيشتغل إزاي بقى أولًا بتتصوري والتطبيق بيحولك لصورة ثلاثية الأبعاد وتبدأي تقيسي الهدوم، تغيري اللبس وتشتري وتحفظي الحاجات اللي عجباكي أو اشترتيها ويعملك زي دولاب عنده علي الموقع علشان تعرفي تجيبي حاجات تليق علي الحاجات اللي في دولابك كمان .. دلع و الله.

معظم المحلات الكبيرة بقي عندها التطبيق ده.. برا طبعًا.

طب لو التطبيق ده اتعمل في مصر هيحصل إيه؟  أكيد طبعًا الستات سواء كانت الأمهات أو البنات هيستفادوا برضه، الأمهات هترتاح علشان مش هتظطر تدخل بأطفالها المحلات وتلف بيهم علشان تلاقي مقاساتهم وتفضل بقي تلبس ده وتجري ورا دي وده يعيط، بالتطبيق ده هتبقي وفرت علي نفسها وقت و زودت راحة بال.

نيجي بقي للبنات هيبقي عندك وقت كتير تقيسي كل الموديلات اللي دايما ما بنجربيهاش في المحلات وتبقي براحتك تجربي من غير ما تلاقي زحمة رهيبة علي طابور غرفة القياس والكاشيير والطرق.

بس آه يا خوفي بقي لو التطبيق ده علشان في مصر، يبقي عامل زي الحاجات اللي بنطلبها أونلاين اللي بيبقي شكلها تحفة علي الموديل بس أما بيوصلنا بتبقي حاجة يعني *#%^&* خلينا نقول إنها دايمًا تطلع مش زي الصورة و خلاص.

أما بقي أصحاب الفشخرة الكدابة هيحبوا أوي التطبيق ده وهياخدوا صور الحاجات اللي بيقيسوها و يجربوها و يوروها لأصحابهم مش بس كدا دول كمان هيحطوا الصور دي عندهم علي الفيس بوك وانستجرام.. طبعا مش هيشتروا في الأخر.

هنلاقي كمان الناس اللي بتحب تزايد على أي حاجة بيخوفوا البنات من استخدام التطبيق؛ علشان أكيد في حد هياخد صورهم بشكل ما ويستخدمها بشكل مش كويس ضدها اكيد.

 تعليقاتكم

Your email address will not be published. Required fields are marked *

*

CONTENT MAK Company