رئيس مجلس الإدارة : رشا الشامي

رئيس التحرير : أسامة الشاذلي

إزاي تبقي هانم في ٥ خطوات؟

هانم

الهانم

بصفتي هانم قديمة، النهاردة جيت أعلم كل بنت بتزور موقعنا ده، ازاي تكون هانم، وازاي تبقي أرقي من أي حد معاه فلوس كتير، وبأخلاقك العالية، تبقي هانم غصب عن عين أي حد من الهوانمات التانيات..!

أنا جاية النهاردة علشان أديكي خلاصة تجربتي كهانم في الحياة، وخدي يا بنتي نصيحة من واحدة قد مامتك، علشان تعرفي قد ايه انا باحبك…

1. أول نصيحة:
الهانم مش بتلقح كلام.
الأخلاق بتبان وقت الفراق..ده كلام مظبوط مية في المية، سواء بنفارق حبيب، بنفركش خطوبة، بنسيب صديق بعد خلاف، ف اللي هتعمليه في نهاية العلاقة هيكشف جزء كبير من أخلاقك وتربيتك، فيه نوع من الناس بتكرس حياتها ل”فقرة التلقيحات” وتقعد تشير في بوستس وتكتب عليها “مقصودة” وفيه ناس “قماصة” بتقعد تعمل بلوك شامي ومغربي للطرف التاني، وده كأنها بتقوله “طب اهو”، وفيه ناس تقد تلت وتعجن وتطلع نفسها بريئة وطيبة في العلاقة، والغلطة كانت غلطة الطرف التاني…وتنقل كلام…

ده كله مرفوض شكلا وموضوعا، وتلقيح الكلام ونقله صفة من صفات أي حد غير الهوانم…الهانم لو اتسألت عن إكس ليها بتقول “محصلش نصيب” ولو اتسألت عن سبب نهاية العلاقة متعيبش ع الحد التاني أبدا…وهي دي أخلاقها دايما..

2. تاني نصيحة:
الهانم بتبتسم دايما..
أقرب طريق لقلب أي حد هما حاجتين: الابتسامة، والتواصل الصحيح، ثقتك في نفسك لما بتقابلي حد لأول مرة بيخليه يفتكرك كويس بعد كدة، سلام الايد القوي، الابتسامة، تحية الناس بالاسم ومجاملتهم لو لزم الأمر هو صفة أصيلة من صفات الهوانم..

متتخيليش انتي ممكن تغيري يوم واحدة من زمايلك ازاي لو قلتليها مثلا ان فستانها حلو النهاردة، أو ان تسريحة شعرها جميلة، المجاملة شيء جميل، وفن مش بيتقنه غير الهوانم الي زيي وزيك.

3. تالت نصيحة:
الهانم بتحترم مواعيدها..
دايما في إشاعة ان البنات مش بتحترم مواعيدها، ده بشكل عام، فدايما في الشغل تلاقي البنت جاية متأخرة ومعاها خمسة مليون حجة، مع انها لو كانت قامت الصبح بدري نص ساعة، كانت كل الحجج دي هتبطل…انتي كهانم متخليش أي حد يأثر عليكي…
لو اديتي معاد لحد احترميه، احترمي مواعيد شغلك، حتي لو اللي حواليكي مش محترمينه، هتشوفي بعد كدة هتفرق معاكي قد ايه ف صورتك والانطباع اللي الناس بتاخده عنك..

4. رابع نصيحة
الهانم دايما نضيفة ومهندمة..
مش لازم الهدوم تكون غالية علشان نكون هوانم..! ياما ناس لابسة هدوم غالية وهما أرخص منها، وياما أخلاق واطية لابسة براندز من جميع أنحاء العالم…
العبرة بنضافة اللبس وهندامه، حتي لو كان مش غالي، المهم تكوني نضيفة، ريحتك حلوة، ومهندمة، وقتها الانطباع الأول بيفرق كتير، والناس بتتشد لشخصية زي شخصيتك يا هانم يا جميلة…

5. آخر وأهم نصيحة..:
الهانم دبلوماسية وكلامها مختصر..
خير الكلام ما قل ودل، بالاختصار المفيد بطلي لوك لوك مع الناس، بطلي كلام مع الي يسوي واللي ما يسواش، خلي الرد علي قد الكلمة، خليكي دبلوماسية، بلاش نرمي دبش ف وش الناس، حاولي تحسسي ع الكلمة قبل ما تقوليها، ولو اتعودتي علي كدة هتلاقي الكل بيحبك، علشان الكل دايما مش بيسمع منك غير الحق والصراحة بس في شكل دبلوماسي يرضي جميع الأطراف…

وأضمن ليكي يا عزيزتي المزة، انك لو مشيتي علي روشتة الهوانم دي، هتتحولي إلي ليدي في خلال شهور قليلة، وساعتها ابقي ادعيلي بقي 😊

 تعليقاتكم

Your email address will not be published. Required fields are marked *

*

CONTENT MAK Company